يا فاوزي يا فاوزي يا فاوزي

اية السلام عليكم ...انا في العادة نمشي بالمثل الي يقل لا ادخل يدك للمغاغر لا تلسعك العقارب و لكن ساعات فمة حاجات تفرض عليك الخروج من الصمت ...فمة حاجات بالعربي تنطقك...بدون برشة تمهيد و تقديم مش ندخل في صلب الموضوع ..لا نضيعلكم وقتكم و لا تضيعولي وقتي(ما غير ما تبهتو في تواضعي.. مسالة الوقت الثمين هذي حكاية طويلة نخليوها لمرة اخري يكون فيها بالي اوسع من هكة) اية يا سيدي كنتش رايض علي روحي نتفرج في الم6..طلعتلي في مخي و دقني ربي حطيت هاك الفضائية تونس7(شر لا بد منه) نلقي برنامج نعتبرو يستحق المتابعة لو كان ينحيولنا شوية تجغجيغ و انحياز واضح لبعض الجمعيات...ما غير ما نطول البرنامج هو الاحد الرياضي...ضيف الحلقة المدرب الوطني فوزي البنزرتي ...الي لحقيقة نحترمو و يعجبني.. و اكيد يعجب برشة توانسة.. لعدة اسباب

1/تحقيقو لنتائج ايجابية تقريبا مع كل الفرق الي يشدها
2/مدرب صارم(صارم معناها شديد من غير ما يمشي مخك لبعيد...)اوكي؟
3/يقولو و الله اعلم انو مع الملاعبية و في خدمتو منضبط

هاذم 3 اسباب يخليوني نحترمو...وليلتها كرزني(كرزني من كريز باللغة الفرنسية مش من ك..زة باللغة العامية..معناها استعمال هالمصطلح ما فيشي قباحة و اعتداء علي مشاعر الاخوة و الاخوات الحساسين)عاد قلتلكم غششني برشة و لعدة اسباب...شد عندك

1/اولا زاد اكدلي مشكلة التوكويك و اكل الحروف عندو...معناها ما انجم نفهمو الا ما نجيب الحبيب ميقالو...راهو كي يتكلم يهبلك...يدخل في جملة ما يعرفش بخرج منها...يولي يسرح و يدخلها بعضها...فهمتشي والا لا...و لا اكثر و لا اقل...متاع حصل معناها...
2/منشط البرنامج سي القنزوعي...يحب ياخذ القايمة متاع لملاعبية الي مش يعيطلهم للمنتخب بالسيف...مرج الراجل و مرجنا...شوية حرفية يهديكم...و لكن سي فوزي لهنا ضهرلي حشام...و هالصفة هذي نعرفها بعيدة عليه...و هي اصلا ما تخرجش عليه...ضهرلي شاهي و ينكس...المنشط يبربشو(باش ما نقولش كلمة اخري) و هو يعطيه اسم و الا زوز...يعاود يسالو...يطيحو...يزيد يعطيه اسم اخر...تقول يبزنس في بنية في الباساج...( و بالاسلوب الكلاسيكي)...تي بجاه ربي...اعطيني نومروك...باهي هاو نومرويا...قداش تلبس في ساقيك؟..الخ

الي فددني انو سي فوزي ما دام عندو ندوة صحفية من غدوة الصباح ما فيها باس شوية صرامة...قولو بابا ما يحبش وه
3/السبب الثالث هو كلمة الختام متاع سي فوزي...الراجل طول بدالنا بالتسامح و التحابب و التاخي
...تقولش خايف لا يدورو عليه من بعدو تقولش عليه مش مسبق الخير

اش من تسامح خويا
يا صديقي لازمك تعرف انو اذا ما حققتش نتيجة ترضينا في الكوب دافريك...لا فمة تسامح لا والو...كيفك كي غيرك(مالتونسة طبعا)...و انت تعرف مليح هذا
و نزيد نعلمك انو هالخطاب هذا هو انعكاس لثقافة الهزيمة...يا اخي ما فيها باس كان تقول مثلا(هاو مش نحاول و ربي عمايا)...هيا نلتفو و نعملو مجهوداتنا...و عنا الامكانيات...و لاباس...و باذن الله نعملو حاجات باهية...الخ

مش نسامحو بعضنا مالضربة لولة...تقول السيد متاكد من روحو مش يغلط...

يا اخي بصراحة هالنوع مالخطاب يفددني...يا خويا خلينا نتعلمو انو كي نخسرو راهي حاجة مش عادية...نحبو في حديثكم شوية انفة و غرور و كبرياء...مايسالشاحنا الاقوي في افريقيا...اينعم فاش خير منك هوما؟

يا ابناء المنتخب...وقت اللي انتوما تلعبو...احنا ما يجيناش النوم و نباتو نحلمو...امي تشعل الكانون و تبخر ..اطير عليكم في العين..مرا كبيرة في العمر تدعيلكم تهز ايديها للسما و تدعيلكم بالنصر...درابو تونس نعلقوه في قلوبنا...نصيحو ..نبكيو..انقزو...نفصعو عالخدمة...و عالقراية...والي عمرو ما فهم كورة يتبع الكورة...وقت اللي انتوما تلعبو..حتي من ديارنا تتسرق
قالو تسامح..اشكون مش نسامح..انتوما و الا السارق(مع العلم انكم كي تتخادلو انتوما..ما عاد فمة حتي فرق بينكم و بين السارق)..و فاش مش نسامح في وقتي و الا اعصابي و الا فلوسي...الخ

يا سيدي احنا مع التسامح في معانيه الاخلاقية السامية...و لكن مش مالمرسي نبداو نقذفو....

يا سي فوزي...المنتخب التونسي مرة وحيدة يهز كاس افريقيا و بالدز...و انا نشوف انو احنا الاجدر بها في الدورة هذي...احنا الاحسن افريقيا و عنا كل الامكانيات و الضروف ....
يزيونا من حضبة و قول...و كان ترشحنا يكفي...و كان ما ترشحناش نطيرو المدرب...و نبكيو جمعة في التلفزة و الراديو..و ديما يمشي

يا سي فوزي حتي كان ما سامحناكش...ما عنا ما نعملولك...و لكن كن كبيرا...مجتهدا...غيورا...واثقا...و صارما(يزي احشم) و الي اللقاء